حكاية معتوق وصفية مع البنت اليونانية..

حكاية معتوق وصفيه مع البنت اليونانيه !!



معتوق: اصبحنا واصبح الملك لله .......... يارب ياكريم يامرخص الحريم

صفيه: معتوووووق ترى سامعتك

معتوق: هههههههه ماشالله عليكي ياصفيه عمرك دحينا خمسين سنه ولسه سمعك قوي

صفيه: امسك الخشب يابو اسعد وصلي على النبى لو صارلي شيء والله ماني مسامحتك

معتوق: ياشيخه امزح معاكي الله يعطيكي العافيه وطولة العمر

صفيه: طيب ياليت تغير الدعاء هدا حقك 35 سنه وانت ترددوا وتحرق اعصابي

معتوق: يا ام اسعد والله حريم الدنيا كلهم مايسووا ظفرك بس هاتي الفطور وفضيها سيرة

صفيه: دقايق بس واجيبلك الدبيازة والفول وحلاوة ابو نار

معتوق: ياعيني على الدلع ... ليش هدا الفطور الملكي ؟؟ ايش عندك اليوم

صفيه: والله يا ابو اسعد عندي اليوم هرجه ونفسي ادردبها قدامك

معتوق: اصلآ انا شايفك لكي كم يوم
وانتي تتحرقصي كأنك قاعده على بيضه

صفيه: والله بصراحه يابو اسعد مرررررررة زهقانه وطفشانه

معتوق: ماعليكي اليوم ناخد فرشتنا والشاهي والفصفص ونروح مزدلفه

صفيه: يوووووووه يا ابو اسعد انت ماعندك غير مزدلفه

معتوق: ايش اسويلك طيب نحن اهل مكة مساكين اللي يطفش ماله الا مزدلفه او الشعيبه

صفيه: ليه عمرك ماسمعت انو في ناس تسافر بلاد بره

معتوق: ايووووووة ......... صاير شغلك على تقيل ياصفصف

صفيه: وليه هما الناس احسن مننا في ايه يعني ؟؟

معتوق: يعني قصدك تبغينا نسافر بره البلد

صفيه: ايوة زي مايسووا كل الناس في الصيف

معتوق: والله ياحرمه شكلك انتي تقريء الكف او مشعوذة

صفيه: مشعوذة في عينك ....... ياشيخ قول كلام غير دا

معتوق: تصدقي الموضوع هادا على بالي بس كنت خايف انك ماتوافقي عشان تغاري عليا من البنات

صفيه: وليه انت على بالك لوسافرنا راح اسيبك دقيقه واحده لحالك ...... لا ياعمري رجلي على رجلك في كل مكان تروحه

معتوق : الله الله الله الله هدا كله حب ؟؟

صفيه: واكتر من كدة كمان بس انت منتا اخد بالك

معتوق: طيب ايش رأيك نسافر مصر ولا سوريا

صفيه: لا عيوني انا مو اصوم اصوم وافطر على بصله

معتوق: اجل فين تبغيني اوديكي المريخ ولا زحل

صفيه: ياراجل ايش الكلام هدا انت تبغى تمشيني ولا تموتني ؟؟

معتوق: كمان انت جننتيني ...... معروف انو الناس لما تسافر تروح يامصر او سوريا

صفيه: لا وفي ناس كمان تسافر اوروبا ولا هدول ماسمعت عنهم

معتوق: ايوه ياعياااااااااال ......... انتي وصلتي لاوروبا ياصفصف ..... انتي صاحيه ولا مسخنه اليوم اوروبا مره واحده

صفيه: ايوه اوروبا يامعتوف ...... انا ما اسافر دول عربيه ابدآ

معتوق: وايش فيها يعني الدول العربيه ..... ماهم اهلنا ومننا وفينا

صفيه: لاحبيبي شوف عندك جارتنا ام عبير قالت انو كانت تسافر دول عربيه بس كلها نصابين وحراميه وبعدين بطلت من الدول العربيه وصارت كل سنه تتنطنط بين دول اوروبا وتقول
صراحه تعاملهم هناك مرة كويس

معتوق: وين تبغي انشالله انتي في اوروبا لندن ولا باريس ولافرنسا

صفيه: ههههههههه الله يقطع شيطانك لاحد يسمعك باريس وفرنسا واحدة

معتوق: انا داري عنك كمان تبغي تودينا اماكن لانعرفها ولانعرف لغتهم

صفيه: بسيطه يابو المعاتيق يقولوا هناك الواحد اول مايوصل ياخد معاه مرشد وهو يترجملوا كل شيء

معتوق: والله انك عفريته ........ اترينك مرتبه كل شيء وانا نايم على وداني........ لاتكوني حاجزه كمان وانا ما ادري

صفيه: لا يا ابو اسعد برضو انت راجل البيت وانت اللي تروح تحجز دحينا

معتوق: دحينا ...... دحينا ؟؟

صفيه: ايوه الله يخليك اجبر بخاطري الله يجبر بخاطرك

معتوق: وفين تبغينا نروح ياستي ؟؟

صفيه: نروح اليونان يقولوا حلوة ورخيصه ......... يعني على قد فلوسنا

معتوق: ايش يقولوا علينا عيالنا دحينا ........ بعد مازوجناهم رحنا نتصرمح بره

صفيه: ياشيخ كل واحد يعيش حياته زي ماهو يحب

معتوق: توكلنا
على الله واليه المصير

وبالفعل الجماعه لموا عفشهم وراحو المطار وركبوا الطيارة

صفيه: معتوق............. والله انا مرررة خايفه انت عارف انو هدي اول مرة اركب طيارة

معتوق: يعني انا اللي كنت طيار وانا صغير ........مو انا برضو اول مرة اركب طيارة

صفيه: والله لو رحنا بالبيجو حقك كان احسن

معتوق : بيجو ايه ياحرمه والله هدي ماتوصلنا حتى المدينه

صفيه: طيب احضّني يا ابو اسعد انا مره خايفه

معتوق: احضنك ايه ؟ بلا قلة حياء ياحرمه قدام الناس .... بس انتي اربطي الكمر على خصرك واقريء دعاء السفر وربك يعدلها

معتوق وصفيه في الاراضي اليونانيه

معتوق: الف حمدالله على السلامه ياعمري

صفيه: الله يسلمك ياحياتي

معتوق: الله ياصفصف والله وعرفتي تختاري شوفي البلد كيف حلوة وبناتهم احلى واحلى

صفيه: معتوووووووق وديني لو ماتبطلك الكلام هدا ترى اشرد منك هنا وارتاح من ملايكة اهلك

معتوق: ههههههههه ياشيخه امزح معاكي ........ وسعي
صدرك شويه

صفيه: المهم شفلنا فندق على البحر ويكون شرح شويه

معتوق: طلباتك اوامر ياعسل

معتوق وصفيه في فندق كوناكيوس في اثينا

معتوق: الله ياصفيه تعالي هنا في البراندا وشوفي البحر وكيف الناس مبطحين على الرمله

صفيه: وليه من البراندا ....... غير الفوطه والبس جلابيه وخلينا ننزل بنفسنا على البلاج

معتوق: يالله ياستي ننزل نتمشى وهو نحن جينا هنا ليه

معتوق وصفيه على الشواطيء الرمليه

معتوق: والله صحيح ربنا اعطاهم الدنيا واعطانا الآخره ...... شوفي كيف عايشين حياتهم بالطول والعرض

صفيه: صحيح للسفر سبع فوائد

معتوق: طيب ايش هي السبع فوائد

صفيه: والله مدري عنها بس الناس يقولوا كدة

معتوق: والله انك صادقه خلينا ننبسط وبس

فجأة وهما يتمشوا لمحت صفيه صخرة كبيرة وباين من وراها رجول حرمه وهي تزعق
صرخت صفيه: معتووووووووووق الحق

معتوق: ايش فيه ياحرمه خير ؟؟

صفيه: شوف الوليه الحجرة طاحت عليها وجالسه
تزعق

معتوق: الله الله الله وايش قدرنا نرفع الحجرة هادي

صفيه: يابويه الحق الحرمه قبل ماتموت

معتوق : يالله نروح سوا

ويشمر معتوق جلابيته وصفيه بالبالطو حقها وهات يا جري يبغوا يلحقوا الحرمه قبل ماتموت ولما وصلوا عند الصخره وطالعوا لقيوا حرمه وراجل في وضع مخل بالشرف !!

صفيه: يعععععععععععععععع

معتوق: الله يقرفكم

صفيه: الله يهلكك يابعيده وانا سامعتك تزعقي ........ حسبت ان الحجرة طاحت عليكي واترينك جالسه تعملي ملوخيه مع السربوت هادا

معتوق: ايش قلة الحياء هادي ياسرابيت يعني من قلة البيوت عندكم ؟؟

صفيه: معتوووووووق انا ما اجلس دقيقه واحده في البلد هادي

معتوق: مو هادي شورتك المعفنه ؟؟

صفيه: وانا ايش دراني انهم يعملوا ملوخيه في الشوارع

معتوق:طيب ايش الحل دحينا ؟؟

صفيه:اقرب بلد عربي او اسلامي

معتوق: اقولك مالنا الا تركيا يقولوا قريبه من هنا مرة

صفيه: يالله يا ابو اسعد حاسه اني راح استفرغ من
اللي شفته

معتوق: بصراحه موقف مقرررررررررف

معتوق وصفيه في تركيا الإسلاميه

صفيه: ايوة يا اخوياهادي البلد محترمه مو زي اليونان الله يخسفبهم

معتوق: صراحه ........ اسطنبول احلى وفيها حرية منظمه وتنفع للعوايل

وجلسوا معتوق وصفيه يتصرمحوا في الأراضي التركيه اسبوع في اسطنبول واسبوع في يلوة واسبوع في انطاليا وقضوا شهر العسل في الوقت الضايع ورجعوا للديار المكاويه وقالوا للناس حكاية الملوخيه وحذروهم من السفر الى الأراضي اليونانيه !!!

هههههههههههههههههههههههههههههههههههههههههههههههههههههههههههههههه مشكوور

هههههههههههههههههههههههههههههههههههههههههههههههههههههههههههههههه مشكوور

ههههههههههههههههههههههههههههههههههههههههمشكوووووووووووور علي ردك